یازار: آیدین جانییئو yazar: Aydın Canıyev

کؤچورن: حسین واحدی köçürən: Hüseyn Vahidi

 

"وورونوک” شهرکناری بولوارلا پارالئل [موازی] یول‌ ایله ایره‌لی‌له‌ییردی. ایره‌لی‌له‌ییردی دئمک ده اولماز، "آددیم-آددیم” قاباغا گئدیردی. پارک آبادلاشدیریلیردی، یولدا تمیر ایشلری آپاریلیردی. یایین جیرهاجیریندا محبوس‌لار بالاجا بیر گؤزلوک‌دن اطرافا باخماق اوچون بیر-بیرینی عوض‌له‌ییردی‌لر. اؤزل دوستاق اییی سککیز آچارلا باغلی بو مینیتورمنی باشینا آلمیشدی.

هله اوچ یوز کیلومئتر یول گئدسیدی‌لر. گؤزلوک‌دن چکن آزادلیق جاذبه‌سی و خوشبخت‌لیک گؤرونتولری محبوس‌لاری ویجدانییلا اوز-اوزه قویموشدو: کیمی ائتدیگی‌نین جنایت اولدوغونون فرقیندیدی، کیمی دوغرو آددیم آتدیغی امین‌لیگینده... اما هله، هره اؤز حسابینی اؤز ایچینده چکیردی.

آذرین بئینینده بیر جمله کؤهنه پاتئفون والی کیمی فیرلانیردی: "حیات آدامی باشین‌داکی پاپاغی قورویاندا بئله باغیشلامیر”.

بو سؤزلری اونا اون دؤرد ایل حبسده یاتمیش بیر کیشی سؤیلمیشدی.

غیرتی‌نین قوربانینا چئوریلمیش، اون دؤرد بیچاق ضربه‌سینه اون دؤرد ایل محبس حیاتی سورموش قاتل سووئت [شوروی] دؤنمین‌دکی جینایتین‌دن دانیشیردی: "او اون دؤرد ایلده هر گون منی اینجیدیب، ثبوت ائتدی‌لر، من "اُوغراش”ام. تورمه‌دن چیخاندا گون اوزو گؤرمه‌ین خانیمیمین تندیرده چؤرک بیشیرمک‌دن اوزو قاپقارا قارالمیشدی، قیزیم آتا‌سیز گلین کؤچموشدو، اوغلوم آتا‌سیز بؤیوموشدو...”

بونونلا دا اونا - آیری‌سی‌نین ناموسو اوستونده ووروشموش آذره دئمک ایسته‌میشدی، گرک باش قوشمایایدین. تانیمادیغین یاد بیر قیزجیغازا گؤره اؤز قیزینی تک بوراخماق مجبوریتینده قالمایایدین.

بونو اونا چوخ‌لاری سؤیلمیشدی، اما ندنسه بو کئچمیش دوستاغین سؤزلری داها چوخ یادیندا قالمیشدی.

بلکه ده، ائله بلکه‌سیز ده، اونونچون دانیشمیشدی‌لار، ایسته‌مه‌میشدی‌لر داها بیر ائو باش‌سیز قالسین، داها بیر قادین تندیرده چؤرک بیشیرمک‌دن قارالیب بالاسینی اوزوآغ ساخلاسین، داها بیر قیز آتا‌سیز گلین کؤچسون، داها بیر اوغول آتا‌سیز بؤیوسون، آتا دیری اولا-اولا... اون دؤرد ایل مؤهنتله دؤیونمه‌یه، چیرپینماغا غیرتی چاتان بیر اورک صاحبی‌نین "ناحاق باش قوشموسان” دئمه‌یی ائله-بئله مسئله دئییلدی.

پنجره‌دن باخماق نؤوبه‌سی آذره چاتمیشدی. آما امتنا ائله‌دی، هئچ نه دئمه‌دی (نئچه واختدی هئچ نه دانیشمیردی)، ساده‌جه، باشینی بولادی. نه بولواری، نه دونیا ایشیغینی، نه هر شئی‌دن خبرسیز ساکت-ساکت دالغا‌لانان بایراغی گؤرمک ایسته‌ییردی.

ایکی گون‌دن سونرا تزه‌جه عالی مکتبه داخل اولموش قیزی رایون‌دان باکی‌یا گله‌جکدی. اوخوماغا.

او، قیزی‌نین یانیندا اولمایا‌جاقدی. ایلک درس گونو مکتبه آپارا، ایلک هفته‌سونو بولوارا گزمه‌یه چیخارا بیلمه‌یه‌جکدی. اؤز باشین‌داکی پاپاغی قورویاندا بئله آدامی باغیشلامایان حیات، اؤزگه پاپاغینی قورودوغو اوچون اونونلا نئجه داورانا‌جاقدی، گؤره‌سن، اونا حیاتی نئچه ایله باشا سالا‌جاقدی، جزا بیر یانا اونو - هله ده اؤزونو گوناهکار سایمایان بو "گوناهکار”ی پئشمان ائدجکدیمی، هانسیسا بیرینی حاق یولون‌دان دؤندریب، "گرک باش قوشمایایدین” دئیه‌جک قدر سیندیراجاقدیمی؟

آخی "ایچری”دکی آدامین چؤل‌دکی حیات‌دان قورخوسو تأثیر امکان‌لاری‌نین صفر اولماسین‌دان یانادی.

آخی اینسان گوجلرینی ایتیرنده عاجزلشیر.

آخی اینسانین حاق یولوندا فداکارلیغی‌نین دا سرحدلری وار.

بیر سؤزله، پئشمان اولاجاقدیمی؟ ایتیردیک‌لری خلاص ائتدیگی او بالاجا قیزجیغازین حیاتین‌دان باهامی اولا‌جاقدی؟

بلکه ده هه. بلکه ده یوخ