بیری واردی، بیری يوْخدو، بیر چيیرتکه واردی. اوْ هله چوْخ بالاجا اوْلدوغوندان، چوْخ اۇزاغا اۇچا بیلمیر، تئز يوْرولوردو. بیر دفعه‌‌ اوْ اۇچدو، اۇچدو، تئز ده  اوْرولدو. گؤلمچه‌نین اۆستونه دۆشموش بیر يارپاغا قوْندو کی، هم دینجلسین، هم ده سۇ ایچسین. بۇ واخت بیر قۇرباغا هوْپپانیب اوْنو تۇتدو. چيیرتکه هاي-کۆي سالدی:


 سسین ائندیر-دانلود


- بۇراخ منی، سۇسامیشام، سۇ ایچیرم! 

- بۇراخیم سنی، سوْنرا آج قالیم؟

- کیم آجسا منی يئمه‌لیدیر؟

- اوْ بیریلیری بیلمیرم، من سنی يئمه‌لیيم!

- دلیسن، منی نیيه يئيیرسن؟

- دلی دئيیلم، قايدا بئله‌دیر. گۆجلو گۆجسوزو يئمه‌لیدیر!

- بئله چێخیر هامیدان گۆجلو سنسن؟

- ائله‌دیر، هامیدان گۆجلو منم!

قۇرباغا چيیرتکه‌نی توْرباسینا سالدی کی، آپاریب يئسین. قۇرباغا بیلمیردی کی،  کؤستبک اوْنا قۇلاق آسیر. صؤحبتین بۇ يئرینده کؤستبک دؤزه بیلمدلی، قۇرباغانی آياغیندان تۇتدو. قۇرباغا قۇرولدادی:

- قۇرررر، قۇررررر….، بۇراخین منی….. قۇرباغا کؤستبيی گۆجله تانیدی:

- کؤستبک، آ کؤستبک، يالواریرام، بۇراخ چێخیم گئدیم، يئمه منی، نه اوْلار؟

- بس باياقدان چيیرتکه‌نین يانیندا لوْوغالانیرسان کی، مئشه‌ده هامیدان گۆجلوسن، بس نه اوْلدو؟ هانی سنین گۆجون؟

- سهو ائله‌میشم، ان گۆجلو من دئيیلم، سنسن! کؤستبک گۆلدو. قۇرباغانین سؤزلری اوْنا لذت ائله‌دی:

- بیر داها دئ! برکدن دئ! قۇرباغا داها دا برکدن قۇرولدادی:

- قۇررر، قۇرررر، ائشیدین بیلین، مئشه‌ده ان گۆجلو حئیوان کؤستبکدیر! کؤستبک ائله اۆرکدن گۆلدو کی، گۆلمکدن خێردا گؤزلری بیر آز دا بالاجالاشدی. گؤزلرینی تام آچاندا ایسه گؤردو کی، قارشیسیندا بیر تۆلکو دايانیب. تۆلکو بیر الینی بئلینه قوْيموش، دیگر الینده ایسه توْربا تۇتموشدو. اوْ، گؤزلرینی حیله‌‌گرجه‌سینه قێيیب دئدی: 

 

 

- ائشیتدیم، دئمیسن مئشه‌نین ان گۆجلوسو سنسن، دۆزدو؟ کؤستبک باشا دۆشدو کی، آخیر گۆنلریدیر. آمما جان شیریندی دئيه، بیر يوْل آختاردی کی، تۆلکودن جانی قۇرتارسین:

- من دئمه‌دیم هامیدان گۆجلو منم، اوْنو قۇرباغا دئيیردی.

- سن ایسه اوْنا بیر دفعه‌‌ دئمه‌دین کی، سندن ده گۆجلوسو وار؟ آدی دا تۆلکو لعله‌دیر؟

- بۇ البته‌‌ ائله‌دیر، مئشه‌ده ان عاغیللی، ان گۆجلو تۆلکو لعله‌دیر!

- اوْندا دۇرما، آجام، اؤزون گیر توْربايا، آپاریم سنی يئيیم! کؤستبک قاچاندا تۆلکو اوْنو تۇتوب توْربايا سالدی و يۇواسینا آپاردی. آز گئتدی، چوْخ گئتدی، يوْلدا شیره راست گلدی.


- هارا گئدیرسن، نیيه گئدیرسن؟ نه آپاریرسان، هارا آپاریرسان؟ تۆلکو قوْرخدو شیکاری الیندن چێخا، يالان دانیشدی:

- يۇوامی تمیر ائله‌يیرم، اوْنا گؤره قۇم داشیيیرام! شیر ایناندی. گئتمک ایسته‌ينده توْربادان “قۇرررر” سسی ائشیدیب غضبلندی. اوْنو حیرصلندیرن ایسه هله هئچ واخت شیرین الیندن ساغ قۇرتارمايیب. شیر بیر نره چکیب تۆلکونون اۆستونه جۇمدو. بۇ واخت هاردانسا بیر اوْوچو پئيدا اوْلدو و دارتیشان شیرله تۆلکونو نیشان آلدی. خوْشبختلیکدن اوْوچو ماهیر اوْوچو دئيیلدی. گۆلله هئچ کسه ديَمه‌دی. هره بیر طرفه قاچدی. تۆلکو قوْرخودان الینده‌کی توْربانی يئره آتدی. چيیرتکه، قۇرباغا و کؤستبک توْربادان چێخیب قاچدیلار. چيیرتکه چوْخ قوْرخسا دا، باشا دۆشدو کی، ان گۆجلو کیمدیر…

برگرفته از سایت بالاجا خوخان