بير گؤل واريدي!

بيري واريدي بيري يوخودي، آللاه ياردميش بير گؤل واريدي.بو گؤلون سووي اؤزي كيمي دوزلويدي، چوخ دردلره درمانيدي، اوزاقدان ياخيندان آدملار گليب و اؤزلريني اونون دوزلاريندا قويلارديلار تا دردلري درمان اولسون. بو موضوع سبب اولموشدور بو گؤلون اطرافيندا ياشايش يارانسين. گونلر گئچدي، ايللر گئچدي، نئچه سده لر گلدي گئدي، بو گؤلون آدي ديللره دوشدو، آدي شاني دونيايا ياييلدي.

گؤلون اطرافيندان ياشييانلار چؤخ موتلو ياشاييشدايديلار،قم، قصه اولاردان اوزاق، اؤز زحمتلري ائله گؤن سوووردولار، باغلاري باغچالار ياشيل، زميلري بركتليدير.

 

گونلرين بيرينده بير عاغيللي تاپيلدي! بو عاغللي آدمامين مين فراستدي نوه و نئتيجه سي واريدي اولار ائله اوتوردو دوردي ددي نئجور اولار گلك بو گؤله گلن سولارين قاباقيندا داينديرما قوراق و او سولارلا بويؤك باغ و باغات قوراق، بورداكي آداملارين لياقتي بودير گرك بولارادان آرتيق باغلاري باغاتلاري اولسون، بو گؤلون سوويدا كي دوزلي دور و درده ديمز!

هامي نوه و نئتيجه سي دديلره ساغ اول چوخ گؤزل اولار، بو گؤزل فيكردي بو دوزلي گؤلدن بيزه نه چيخار؟

باشلاديلار گؤله گلن سولارين قاباقيندا داينديرما قوروب و گؤلون اطرافيندا قويولار قازسينلار و چوخلي بودجه لر صرف ائله سينلر كي گؤله گلن سولارين قاباقين آلسينلار.

گؤلون سيزيلتيسي و يارالانميش قول قاندي اورگ يانان آغسقلري بير يئره ييخدي، اونلار گلجكي و نه اولاجاقي بيلرديلر، بو سببدن عاغللي آدامين يانينا گئديب دئديرلر:

 قارداش بو ايشي گؤرمه ين، بو گؤلو قورتماين، بيزيم ياشاييشميز، ديري اولماقيميز بو گؤله باغليدير، سيز بو ايش ائله بيزيم حياطا سون ياراديسينيز، گؤل قورسا بيز بوردان كؤچمليك، بورا بيزيم آتا، آنا يورودوموزدور، بو گؤل بيزه آتلاردان قالان هديييه دي.

فراستلي و عاغللي آدام بو سؤزلره گولدي، اونلاردان نئچه سيني دوستاقا يولادي و آدلاريني سئپاراتيست قويودو. بو وضع ائله دانيشانلاري ساكيت ائله دي و اؤز ايشنه دوام وئردي.

چوخ زامان كئچمه دي كي گؤلون سووي آزلاماقا باشلادي، و او گؤزل دوزلي قنديللر محو اولدولار و چيقلي دوزلي سودان ياشييان حئيوانالار حياطلارين الدن وئرديلر، گؤزلليك بيزم زونلاردا سولغون اولماقا باشلادي.

عاغللي آداملار الي ائله گؤلون سون ياييشينا گليب چاتيق، ايندي بيلميريك بو دوزلارلا كي گؤلدن قالخيب باغلارادا اؤتوروللار نئينه مه ليك؟ ايندي بو دوزلارلا كي بيزي اؤو و ايشيگيميزي موحاصره ائديبلر نئينه مه ليك؟

ايندي معلوم اولور كي او عاغللي آداملار ايشلرين دوز گوروبلر، بو سببدن كي گؤلون قوروماسي بيزيم باغالاري قوروداجاقدير! بيزيم آسايشميزي الدن آلاجاقدير، ميليونلار خانواده ني مجبور ائلييه جكدير اؤز وطن لريننن كؤچوب قوربت يئرله ره گئتسينلر و اوردا اونا بونا فهله ليك ائلييب و يا يئر سؤپورن اولسونلار، بو نييت ائله آللاه يارادان گؤلي قوروتدولار تا ميليونلار آدامي اؤز وطنلرينن كؤچدورسينلر.

او عاغللي آدام بيليردي كي گؤل قوروياننان سونرا بيزه نه باغ قالاجاق نه اؤو ائشيگ، نه شاٌن قالاجاق نه توركلوك.

یازان : محمود دالغا