• شعر مولکونون شهریاری آدلانان داهی شاعیریمیز رحمتلی اوستاد سید محمد حسین شهریارین تورکجه – فارسجا شعرلرین آراشدیراندا ، بیر چوخ گئرجک لرله قاباق قارشی دا دایانماق اولور . اوستادین شعر دیوانیندا باشقا شاعیرلر کیمی دوروموزله ، گئچمیش شاعیر و یازیچی لارین بیر سیرا سینین آد – سانلاری قئید اولوب و بو مسئله اولو شاعیریمیزه داها آرتیق بیر محبوبیت قازاندیرمیشدیر .

  • شاعیر شهریاری همشه طالع ایزله میش و ائله اونا گوره گونو – گوندن یئنی نائلیت لره ال تاپمیشدیر . اوستادین دئمک اولار کی بیر چوخلارینین اورک لرینین باشیندا یئری اولموشدور . ایندی بو جماعت ایستر عادی ملت اولسون ، ایستر سه ده ساوادلی یا خود همان ضیالی .





  • اولکه میزین بو بویوک و کورگملی بالاسی نین صنعت کارلیغی تورک – فارس ادب پرورلرینه اوزل لیک له قونشو اولکه لرده گونش کیمی پارلامیش و آیدین بیر مسئله یه چئوریلمیشدیر . اوستاد اوزوده سانکی بو مسئله یه واقیف ایدی . نییه کی ، اوزو بیر یئرده ایندی دئمه سین بئله بویورموشدور :

  • شهریارا تو به شمشیر قلم در همه آفاق

  • به خدا ملک دلی نیست که تسخیر نکردی
  • اوستاد شهریارین بیر چوخ اولکه لره علاقه سی اولسادا ، آنجاق آذربایجانین شومال حیصه سینه داها آرتیق علاقه سی وار ایدی کی بو مسئله نی تورکجه شعرلرینده آپ – آیدین گورمک اولور . بو سئوگی اولدوغو کیمی بیر یانلی اولمامیش و اورانین دا شاعیر و یازیچی لاری بو میثل سیز شاعیریمیزه کونول وئرمیشلر و اولدوقجا اونو و پوئزیاسین تعریف – تمجید ائتمیشلر .
  • اوستاد شهریارین تورکجه غزللرین اوستاد علی آقا واحد له مقایسه ائدنده باشقا بیر حقیقت له اوز – اوزه دوروروق . نییه کی او ساده لیک و آخیجیلیق کی واحدین غزللرینده گوزه چارپیر ، مبالغه سیز دئسک اوستاد شهریارین شعرلرینده از گورونور . البته بو دا بیر نقصان دئییل نییه کی  داهی شاعیریمیزین شعرلری داها چوخ خواص اوچون یاراشیر . البت دئمک ایستردیک کی ، بیلدیینیز کیمی اوستاد شهریار تورکجه میزده بیر او قدر غزل یازماییب . بیر حالداکی علی آقا واحد عومرون غزل صنعتینین چیچک لنمه سینده باشا وئرمیشدیر . بو ایکی اولو شاعیریمیزین بیر بیرله رینه سونسوز علاقه و محبت لری وار ایمیش . اوستاد شهریار واحدین شعرلرینین اوخونماسیندان قورتاردیقدا داماغی طاملی اولاراق بئله اوندان سوز – صحبت آچیر :

  • سارقیندی او سوسن لره ، سونبول لره کونلوم

  • بولبول کیمی قان دیر او قیزیل گوللره کونلوم

  • « واحد »لره ، « قابیل »لره ، « بولبول »لره کونلوم

  • شاعیر اولالی بورجلو دور « صابیر»لره کونلوم

  • «وورغون» دی «سولیمان»کیمی «ساهیر» لره کونلوم

  • همین دیرلی بیت لری اوخویوب گورن علی آقا واحدین محبتی بیره اون اولوب ، جوشماغا باشلاییر . اونا وئریلن احساسا گوره علی آقا  واحد اوستادا چئشیدلی بیر شعر یازیب ، گوروشونه چیرپینان اوره یینه بیر ملحم سایاغی اولور :

  • سن سئوگیلیم بو حوسن له ائللر نیگاریسان

  • اودلار دیاری نین گوزه لی ، شهریاری سان

  • ایلهام آلیر جمالینی گوردوکده ائل سنین

  • خالقین  سئویلمیشی وطن افتحاریسان

  • دیز چوکسه حقلی دیر سنه دونیا گوزل لری

  • بابک لرین ، کوراوغلولارین یادی گاری سان

  • بولبول سن ایله شوره گلیر ، گول صفالانیر

  • سن بو حیات گولشنینین نوباهاریسان

  • بیلمم نه سیردیر ؟ هامی نین عشقی وار سنه

  • خلقت ده سن ، زمانه میزین بختیاریسان

  • تاریخه باخ گوزللر اولوب هر زمانیدا

  • سن ده بیزیم زمانه میزین گول عذاریسان

  • « واحد » بو قاره گوزلو یامان مست ائدیب سنی

  • عالم آییلدی سن هله عشقین خوماری سان .
  • غزل شاعری علی آقا واحددن سونرا هابئله قاباق بیر چوخ شاعیر و شاعیره لرین ده اوستاد شهریارا سونسوز سایقی و علاقه لری وارایدی . بونلاردان سون ایللر آدی نسبتا اونودولموش بویوک شاعیره میز رحمتلی مروارید خانیم دلبازی نین دا آدین حورمت له گوسترمک اولار . آشار – داشار آذربایجان ادبیاتی نین دادلی – دوزلو عین حالدا تانینمیش و گوجلو یازار نزاکتلی شاعیره لرینین بیریسی ده پاشا قیزی مروارید خانیم دلبازی اولموشدور . بو خانیم 1290 ینجی گونش ایلینده آذربایجان جمهوروسونون قازاق ماحالینین موسی قالا کندینده آنادان اولوب 90 ایل ثمرلی عومور سوردوکده یاشایش یوکون یئره قویموشدور . شاعیره میز مروارید خانیم دلبازی نین جنوب آذربایجان اوزل لیک له تبریزدن اوترو اوره یی همه شه چیرپینیب بیر تیکه اولموشدور . او تبریزه گلمک اوچون هئی گونلری سانیردی. رحمتلی مروارید خانیم ، بیر یئرده بئله بیر افاده ایشله دیر :

  • گوزل تبریز ائل لرینه

  • بیر گون قوناق گلمه میشم

  • با باشقا بیر یئرده ایسه بئله دئمیشدیر :

  • من تبریزده یارالاری

  • ساغالت ماغا گئده جه ییم .

  • مروارید خانیم دلبازی تبریزی یوخ بلکه بورادان قووزانان میللی قهرمانلاری هابئله ادبی – اجتماعی سیمالاریمیزی دا آلقیشلاییب یئری گلمیشکن ، یاد ائتمیشدیر . ایندی بو آرزی گوز شاعیره نین رحمتلی اوستاد شهریارا اتحاف ائتدییی شعرین بیرگه اوخوجوسو اولاق :

  • جان قارداشیم نه کورک سن

  • نییه دئدین اوردا تک سن

  • ارضه کوک آتمیش نهنگ سن

  • توتوب عالمی شهرتین

  • سن ابدی بیر وارلیق سان

  • خلقینه بختیار لیق سان

  • گونش سن بولوددان چیخسان

  • گولر اوزو حقیقتین

  • هر سوزون بیر توپ گولله سی

  • دویوش لرده گلیر سسین

  • آی خلقیمین یئتیرمه سی

  • اوزون سورمز بو محنتین

  • دونیامیزدا دینج لیک هانی ؟

  • هئی توکولور انسان قانی

  • ای عصری نین پریشانی

  • او ده لی دیر شاعیر خلقتین

  • اینله ین ساز سیم سیز اولماز

  • ذیل سیز اولماز ، بم سیز اولماز

  • شاعیر کونلو غم سیز اولماز

  • غمی وارسا ، جمعیتین

  • کونلون عمان دا بیر گمی

  • داشیدیغین دونیا غمی

  • کیم اولموش ها ائل هم دمی

  • اولموش یولو شانلی چتین

  • عزمیمیزدن قوت آلین

  • قیام ائتدیز الی یالین

  • تاب ائده بیلدی می ظالیم ؟

  • قارشی سیندا بو غئیرتین ؟

  • سسین گلیر او ساحیل دن

  • ظلم له دویوشن ائل دن

  • گئچدیینیز قانلی سئل دن

  • کئچیر یولو عدالتین

  • اورا وطن بورا وطن

  • بیری غملی او بیر شن

  • خوش گلیرسن نه واخ گلسن

  • سرحدی یوخ محبتین

  • ایندی گوروشونه چیخار ارلر

  • یول لارینا گول سپرلر

  • حسرت گوزونده ن اوپرلر

  • عزیزی سن سن ملتین

  • سوزو شیرین جان قارداشیم

  • سسی دوغما قان قارداشیم

  • شعرده سلطان قارداشیم

  • نه اولدو دور غضب کارین

  • بو غضبین بو نفرتین .