وطن
چاغيرير ايندي بوتون ميلتي ايمدادا وطن،
دييشيلمز اي اوغول، جنّته دونيادا وطن.
بيزه مئيدان اوخويان بيلمه ليدير بيردفعه ليک،
نه ساتيلماز، نه وئريلمز بينه دن يادا، وطن.
سينه آلتيندا گرک قلب کيمي هر آن دؤيونه،
يانا اولدوز کيمي هر سؤزده، هر امضادا وطن.
وطن عشقيندن اوجالسين بوتون ايستکلريميز،
ياشاسين آرزودا، مقصدده، تمننادا وطن.

 

اولولار اويمادي وار-دؤولته، يالنيز دئديلر:
-ان بؤيوک بخشيشيميز بيزدن هر اؤولادا: وطن!
وطن عشقيندن آلار بختيار اؤز قودرتيني
دؤيونر قلبي کيمي هر يئني ميصراعدا وطن.
1994


 

بايراق
تورپاغيم اوستونه کؤلگه لر سالان
منيم وارليغيمين جيلاسي-بايراغی.
ظفردن دوغولموش
گؤي تورکدن قالان
قورد باشلي بايراغين بالاسي بايراق.

اوچ رنگلي بايراغين کؤلگه سينده من
قاراجا تورپاغي وطن گؤرموشم.
ظفر گوللريني دؤوري-قديمدن
بايراق ايشيغيندا بيتن گؤرموشم.
بايراق منليگيمدير، بايراق کيمليگيم،
بايراق-اؤز يوردوما اؤز حاکيمليگيم.

هاردا اجداديمين آياق ايزي وار،
بو ظفر بايراغيم اوردا ديکلسين.
کئچديگي يئرلرده داغلار، ياماجلار
اونون حوزورونا سالاما گلسين.
تاريخدن قديمدير، زاماندان قوجا
منيم بايراغيما سانجيلان هيلال.
عالمه نور ساچدي تاريخ بويونجا
معبدلر باشما تاج اولان هيلال.

دايم اوجالاسان! ساواش گونونده
عسگر سيلاهييلا سني تن گؤروم.
يالنيز ظفر چالميش شهيد اؤنونده
سني آلقيش اوچون اَييلن گؤروم.
آپرئل، 1998

 

يارب
رحم ائيله اؤزون سن منيم اؤولاديما، يارب،
رحم ائيله منيم ناله مه، فرياديما، يارب.

محروم ائلمه سن اونو دونيا ايشيغيندان،
سن سن پناهيم، سن يئتيش ايمداديما، يارب.

سندن اومورام، اومموشام هر درديمه چاره،
بو خيصلتي من بورجلويام اؤز زاتيما، يارب.

شوکر ائيله ميشم من کي، قدر-قيسمته دايم.
دؤندرمه قدر-قيسمتي جللاديما، يارب.

خوشبخت قولونون بختييار آدلانماسي سندن،
اويغون ائله سن طالئييمي آديما، يارب.

رحم ائيله، اؤزون سن منيم اؤولاديما، يارب،
رحم ائيله منيم ناله مه، فرياديما، يارب.
20 نويابر، 1998


 

باياتيلار
عزيزيم درده مرديم،
دوشمه سين درده مرديم.
منه درمان نئيله سين؟
طيفيلکن درد امرديم.

باياتيلار! سؤزه عنبر قاتيلار،
داماريمدا نبض کيمي آتيلار.
باياتي نين آتشيندن، اودوندان
اورگيمده نئچه تونقال چاتيلار.

باياتيلار! سينه داغي، گؤز داغي،
محبتين توستولنن اوجاغي.
بير ميلتين کيمليگيني بيلديرن،
نفه سيندن لپلنن بايراغي!

باياتي نين بوياسينا بويانديم،
سؤز - قيبلمدير، سؤز - عشقيمدير، سؤز آنديم.
باياتي نين تيلسيمينه دوشونجه
واللاه شاعير اؤلدوغوما اوتانديم.
آپرئل، 1998